A`mal Sareng 'Amal

A`mal nyaeta kecap jama` taktsir tina kecap mufrod `Amal hartosna padamelan.

Ari pirang-pirang padamelan (A`mal) eta aya tilu bagean : 

1. A`malul Jawarih nyaeta pirang-pirang padamelan anggahota badan (lahir), sapertos ngangkat panangan nalika takbirotul ihrom, i`tidal, ruku`, sujud, ngucap lafad-lafad anu tangtu dijero ibadah sholat, maos dzikir lisan, orat sareng sanes-sanesna. Padamelan `amal disebat Khidmatul Jawarih, anapon jalmi anu midamel `ibadah anu mung mentingkeun kana padamelan-padamelan anggahota badan (lahir) disebat Ahlul Khidmah Bil Jawarih atanapi Ahluzh Zhahir alias Ahli Syareat.

2. A`malul Qulub nyaeta pirang-pirang padamelan hate (batin) nyatana ngajalankeun `ibadah kalawan sapinuh manah, atanapi tos nengetan (merhatikeun) kaayaan batin, sapertos niat, khusyu` dijero solat, rasa ihsan dijero `ibadah, maos dzikir manah, atanapi tafakkur kalawan manah, ngagungkeun sareng ngarasa syuhud (nyaksikeun wujud sareng padamelan Allah SWT). Jalmi anu tos ngajalankeun pirang-pirang padamelan hate (A`malul Qulub) disebat Ahlul Mahabbah wal Ma`rifah atanapi Ahlul Batin

3. A`malul Asrar nyaeta pirang-pirang padamelan rusiah batin (batinul batin), sapertos dzikir ruh, dzikir sir,  dzikir sirul asar,  dzikir khofi, sareng dzikir akhfa.

Anapon ditingal dina sisi sae sareng awon, `amal kabagi kana dua bagean:”.

a. `Amal sholih, nyaeta padamelan sae. Amal sholih oge ngandung hartos saban perkara anu ngajak sareng ngabantun dina ketaatan ka Allah Swt. atanapi saban padamelan anu ngajajapkeun kana kataatan ka Allah Swt. naha padamelan lahir, batin atanapi batinul batin. Dina hartos umum, `amal sholih nyaeta sadaya padamelan, lahir, batin atanapi batinul batin anu ngabalukarkeun kana perkara anu positip atanapi mere mangpaat. Tujuanna nyaeta pikeun kasalametan di dunya sareng di akherat.

b. `Amal Tholih, nyaeta padamelan jahat. Smal tholih oge ngandung hartos saban perkara anu ngajak sareng mawa dina kadorakan ka Allah Swt. atanapi saban padamelan anu nganteurkeun kana kadorakaan ka Allah Swt. naha padamelan lahir, batin atanapi batinul batin. Dina hartos umum, `amal tholih nyaeta sadaya padamelan,lahir, batin atanapi batinul batin anu ngabalukarkeun kana perkara anu negatif atanapi henteu mere mangpaat. Tujuanna nyaeta pikeun kacilakaan di dunya sareng di akherat tsumma na`udzubillah.